DAVAO CITY- Gipangunahan sa CSWDO ang gipahigayon nga Donation Drive sa Rizal Park ning dakbayan alayon kini sa nahitabong sunog sa duha ka mga Purok sa Brgy.2-A, Magallanes St.ning syudad sa Davao niadtong Sabado sa gabii.
Inabagan sa pribadong sektor, ang City Social Welfare Development Office nagtinabangay sa pagpahimuna sa mga mga donasyon gikan sa mga pribadong indibidwal alang sa mga nasunugan.
Gikanayon ni Julie Dayaday, ang labaw sa CSWDO nga sakron gikinahanglan sa mga nabiktima sa sunog ilabi na sa mga adunay pamilya ang tubig, hygiene kits, ug school supplies alang sa sunod nga school year nga magsugod karong Huly 29, 2024.
Samtang mihangyo sab ang opisyal sa mga mo-donate nga mga dabawenyo ilabi pa sa mga sanina, mga kagamitan ug uban pa nga gikinahanglan nga isiguro kini nga tarong pa, ug mapuslan sa mga biktima.
Likayan ang paghatag ug mga butang nga dili gilayon niini mapuslan karong panahuna. Samtang sa liang abahin, nakiglambigit na karon ang CSWDO sa kadumalaan sa Magallanes Elementary School kabahin sa temporaryo nga pagpundo sa mga biktima sa ilahang Covered court.
Una ng gipasalig ni Marlou P. De Asis, ang principal sa nasampit nga tunghaan nga andam sila nga modawat sa mga nabiktima sa sunog gamit ang ilahang covered court.
Apan ang ilahang mga classroom ang dili kini mamahimong magamit sa pagkakaron gumikan sa nagsingabot nga pagsugod sa klase.
Samtang gipaklaro sab niini nga ang mga apektadong estudyante nga naapektuhan sa sunog ang makapadayon pa gihapon sa ilahang pagtuon pinaagi sa distance learning, nga adunay learning modules nga ihatag sa ilahang mga magtutudlo.
Sa pagkakaron nagpadayon ang gihimong assessment sa CSWDO sa mga nasunugan ilabi na sa kinatibuk-an nga ihap sa mga pamilya nga nanag-iya ug panimalay, sharers, renters, boarders ug caretakers.
Atol sab sa paghinabi kang Dayaday, gikanayon niini nga adunay ginaproseso na ang ilahang buhatan alang sa financial assistance nga nagkantidad ug P20,000 alang sa mga balay nga totally damaged, samtang P15,000 sa mga balay nga partially damaged ug P5,000 alang uban nga naapektuhan.
Una ng giapud-apuran ug mga modular tent ang mga biktima sa sunog aron nga masiguro ang ilahang privacy.
Samtang padayon sab nga nagadalit ug mga pagkaon ang maong buhatan pinaagi sa ilahang mobile Kitchen nga nagahatag ug mga init nga pagkaon sa mga biktima.
Naghatag sab ug medical assistance ang maong buhatan sa mga naangol nga ang usa ang labihan nga naapektuhan tungod sa maong panghitabo nga karon luwas na ang kahimtang sa Southern Philippines Medical Center.
Gihatagan usab ug tabang ang pamilya sa duha ka mga batan-on nga mga PWDs alang sa “Lamay” ug “Lubong” human nga nalakip kini sa pagkasunog.
Kahinumduman nga mokabat sa kapin 150 ka mga panimalay ang naugdaw sa nahitabong sunog niadtong Sabado pasado alas otso sa gabii nga adunay danyos nga mokabat sa P2.2 milyon.
