Gisaway ni Labor Secretary Bienvenido Laguesma ang pagkalakip sa Pilipinas sa listahan sa top 10 worst countries sa International Trade Union Confederation alang sa mga trabahante.
Matod ni Laguesma, dili kini makatarunganon ug wala magpakita sa kahimtang karon sa nasud.
Dugang pa sa kalihim nga subo ug dili madawat ang rating nga gihatag sa ITUC sa atong nasud diin naghatag kini sa Pilipinas og rating nga 5.
Ang rating nga 5 nagpakita nga “samtang ang lehislasyon mahimong maghisgot sa pipila ka mga katungod, ang mga mamumuo epektibo nga walay access niini nga mga katungod ug busa naladlad sa mga awtokratikong rehimen ug dili patas nga mga gawi sa pamuo.
Gihisgutan usab sa ITUC ang red-tagging ug pagpatay sa mga unyonista sa mga mamumuong Pilipino, lakip ang BPO Industry Employee Network organizer Alex Dolorasa ug Kilusang Mayo Uno (KMU) organizer Jude Thaddeus Fernandez, ug miingon nga ang pagpatay sa duha ka prominenteng unyonista nakamugna og kahadlok ug kini usab nagpahilom ang tingog sa mga mamumuo.
Gikuwestiyon usab ni Laguesma ang gikataho nga kakulang sa pag-access sa mga katungod sa mga mamumuo. Gihatagan og gibug-aton ni Laguesma nga ang mga nahisgutang kaso dili pa igo aron maapil ang Pilipinas sa listahan sa mga pinakagrabe nga nasud.
