Nakighiusa ang Department of Health sa panawagan nga magimplementa og mas istrikto nga regulasyon sa mga baligya nga ilimnong makahubog sa nasud.
Gibuhat sa ahensya ang maong panawagan atol sa usa ka forum nga giatawag nga ‘Alcohol Tax; Itaas’ sa Quezon City kong diin nanawagan ang mga kauban niini sa pagpanguna sa Sin Tax Coalition nga mas taas nga buhis sa alak.
Gawas sa buwis, buot usab sa grupo ang mga istrikto nga mga regulasyon sa pagbaligya sa ilimnong makahubog sa nasud.
Base sa datos gikan sa Global Burden of Disease Health Metrics nga gipresenta sa DOH, ang pagkonsumo sa alkohol ang naila isip nag-unang risk factor o hinungdan sa kapin 27,000 mortalities sa tibuok nasud.
Tungod niini, gipanawagan sa ahensya ang magbuhat og mga polisiya nga nakabase sa ebidensya aron matubag ang sobra-sobra nga pagkonsumo sa alak sa Pilipinas.
Lakip niini ang implementasyon sa public health warning lebels sama sa gibuhta sa mga pakete sa sigarilyo, mas taas nga presyo sa ilimnon ug mas taas nga excise tax, regulasyon sa distribusyon ug komprehensibo nga pagbawal sa pipila ka alcohol marketing.
Samtang, sa una nga pagtuon nga gibuhat sa DOH niadtong 2023, migawas nga dakong bahin sa populasyon sa mga Filipino adults ang nagatuo nga ‘harmless’ ang pagkonsumo sa alak samtang ang uban usab ang nagatuo nga aduna kini nindot nga madala sa atoang pangkalawasan.
