Gialerto na karon sa Department of Health ang ilahang surveillance system nunot sa deklarasyon sa Africa Centers for Disease Control and Prevention (CDC) sa public health emergency tungod sa mpox outbreak sa ilang nasud.
Kung mahinumduman, ang Africa Centers for Disease Control and Prevention kay nideklarar og public health emergency of continental security tungod sa pagtaas sa mga kaso sa mpox o monkeypox.
Kini mikaylap gikan sa Demokratikong Republika sa Congo ngadto sa silingang mga nasod.
Matud pa ni DOH spokesperson Assistant Secretary Albert Domingo, nga niabot na sa siyam ang kaso sa maong sakit sa Pilipinas.
Gikan sa maong ihap, upat niini ang na-detect niadtong 2022 samtang laing lima ka kaso ang natala sa miaging tuig.
Niadtong Hunyo, gilimod sa DOH nga usa ka indibidwal gikan sa Central Visayas ang namatay sa mpox, ug gipasiugda nga walay usa sa siyam ka mga kaso ang namatay sa sakit nga gipahinabo sa monkeypox virus.
