Gipanghimakak sa Department of Health (DOH) ang pagpatuman kuno sa lockdown sa nasud gumikan sa sakit nga mpox.
Gihimo sa ahensya ang pagpaklaro gumikan sa mikatag nga pekeng facebook posts nga adunay kalabutan sa pagpatuman sa lockdown gumikan sa sakit.
Gipahayag ni Health spokesperson ASec. Albert Domingo, wala na kinahanglana ang pagpatuman ug lockdown gumikan kay dili usab airborne ang mpox o wala gipasa ang virus pinaagi sa hangin susama sa COVID-19.
Gipahayag pa sa DOH official, mas daghan pa gihapon ang mga kaso sa mpox nga gikatala kaniadtong 2024 kung ikumpara sa pagkakaron. Mas daghan usab kuno ang gikatala kaniadtong bulan sa Abril kung ikumpara karong Mayo 2025.
Gilambigit usab ni ASec. Domingo ang mga gikatala karon nga kaso sa mpox sa pagkaaktibo sa mga lokal nga kagamhanan sa pagpahibalo sa mga na-detect nga kaso sa ilahang lugar.
Giklaro usab sa opisyal nga wala pa nakasulod sa nasud o wala pay na-detect sa Pilipinas nga variant sa mpox nga clade 1B nga gikatala sa ubang kanasuran.
Matod pa niini, sagad na-detect ang clade II nga mild variant sa mpox nga adunay mas ubos nga mortality rate o anaa sa usa gikan sa napulo nga nataptan sa sakit ang nakabsan sa kinabuhi, kung ikumpara sa clade 1b nga anaa sa upat hangtod lima ang gikatalang nakabsan sa kinabuhi.
Gumikan niini, padayong gi-awhag sa DOH ang publiko nga ang opisyal FB page sa DOH makiglambigit alang sa insaktong inpormasyong panglawas.
Karong tuiga, mas ubos sa 50 ang gikatala karong bulan sa Mayo kung ikumpara sa lagpas 50 nga gikatala niadtong bulan sa Abril. Bisan paman niini, gipahayag ni Asec.
Domingo nga ang mpox mao ang sakit nga magmaayo sulod sa duha hangtod sa 3 ka semana.
Gipahayag pa niini, walay dautan sa pagsuot ug face mask nga gipatuman sa pipila ka LGU aron malikayan ang sakit.
Apan giklaro usab niini nga mapasa ang mpox pinaagi sa close contact o skin to skin, hinungdan nga angay ipatuman ang precaution kung paunsa mapasa ang sakit.
