Gibutyag sa Department of Health (DOH) XI nga dili pa makapahigayon og contact tracing ang ilang buhatan sa mga tawo nga nakahimamat sa managsuon nga OFW nga unang miikyas sa pagka-quarantine gikan sa Glan, Sarangani Province ug mibyahe paingon dinhi sa dakbayan sa Dabaw aron maka-avail og flight padulong Manila ug mobalik unta sa Japan.
Photo by PNA
Sumala kang DOH XI Regional Director Dr. Annabelle Yumang nga ginahulat pa sa ilang buhatan ang resulta sa specimen sa managsuon nga gipailalum sa laboratory test sa Research Institute for Tropical Medicine (RITM).
Gitataw usab ni Yumang nga mild symptoms lamang ang nasinati karon sa usa sa managsuon sama sa sakit sa tutunlan.
Ang nahisgutang magsuon dunay pangedaron nga 30 anyos ug 27 anyos kung diin ang manghod lamang sumala pa ang nakasinati sa maong sintomas.
Kun ugaling mogawas na sumala pa ang resulta, ayha pa sila magpahigayon og contact tracing.
Nasayran nga kagahapong adlawa, March 13 unta ang ika-katorse ka adlaw nila sa pagpailalom sa quarantine kung diin ang usa kanila ang gikatakdang papaulion na samtang ang usa magpabilin una human nga nakitaan na og mild symptoms.
Samtang nagdumili si Yumang sa pag-detalye sa pagka-intercept sa managsuon apan gisiguro niini nga anaa na sumala pa sila sa maayo nga kondisyon ug wala sumala pay angay nga kabalak-an ang mga katawhan sa dakbayan sa Dabaw.
Una nang gibutyag ni Dr. Leopoldo Vega, ang head sa SPMC nga ang managsuong OFW gipailawom lamang kini sa quarantine ug gikinahanglan malikay sa exposure sa mga tawo kung diin gikonsidera na sila karon isip Person under Monitoring kun PUM.
Sumala usab kang Mayor Vivien Yap sa Glan, Sarangani pasakahan nila og kasong pagsupak sa Proclamation no. 922 o state of public health emergency ang magsuon kinsa mitakas gikan sa ilang munisipalidad.
Ubos sa maong proklamasyon, ang usa ka indibidwal nga magdumili sa pagsunod sa mandatory measures aron mapugngan ang pagkatag sa coronavirus disease (COVID-19) mamahimong maaresto ilalom sa state of public health emergency.
Mamahimo usab kining mapriso gikan usa hangtod unom ka bulan ug dunay multa nga mokabat sa P20,000 hangtod P50,000.
