DAVAO CITY – Subling gi-awhag sa Department of Energy (DOE) ang publiko nga undangon na ang paggamit ug refillable Butane canisters.
Nasayran kang Nilo Hirochi, hepe sa Energy Industry Energy Management Division sa DOE 11 ang mga estudyante sa mga boarding houses mao ang sagad nga nagagamit ug Butane gumikan kay barato lamang ang produkto.
Bisan pa niini pahimangno ni Hirochi nga magdala ug katalagman sa seguridad ang mga refilled Butane Canisters, gumikan kay kini mao ang sagad nga hinongdan sa daghanan nga sunog sa rehiyon unse.
Sa kwentada sa DOE sukad niadtong Marso hangtud Mayo mikabat na ngadto sa 6,907 ka mga refillable canisters ang nakompika sa mga palengke sa Piapi, Bankerohan, Agdao, Panacan ug sa mga tindahan sa Upper Malagamot.
Sumala pa kang Hirochi nga niadtong Hunyo 25 lamang nakakompiska ang DOE ug kapin tres mil ka mga Butane canisters.
Gitataw sab ni Theodoric Alingalan, Senior Science Specialist sa DOE nga dili luwas nga butangan ug LPG ang mga Butane canisters gumikan kay posibli kini nga moboto gumikan sa kanipis niini ug wala sab kini makapasar sa standard sa DOE.
