Gihan-ay na sa Department of Migrant Workers (DMW) ang repatriation request sa 223 ka mga Overseas Filipino Workers (OFW) sa Israel
Gipahayag ni DMW Secretary Hans Leo Cacdac, nahilakip na usab sa ilahang gihan-ay ang mga gikinahanglan sa pagbyahe sa 30 ka mga Filipino nga mao ang unang batch nga mubalik sa nasud.
Ang unang grupo sa 30 ang gilangkuban sa 26 ka mga OFW nga nahi-abot sa Jordan, homan ang pag-agi sa Allenby Bridge ug King Hussein Bridge.
Gipaneguro usab ni Cacdac, ang mga mupa-uling OFW ang makadawat ug insaktong hinabang sa gobyerno.
Paghi-abot sa nasud mahatagan ang mga nahisgutan ug P150,000 financial assistance, training vouchers gikan sa Technical Education Skills Development Authority (TESDA), allowances, psychosocial counseling ug post-arrival medical check-ups.
Sa kasamtangan, gipahimutang sa DFA sa Alert Level 3 ang Israel ug Iran gumikan sa padayong panagsangka.
Gumikan niini, gitambagan nila ang mga Pinoy sa Israel ug Iran nga ikonsedera ang repatriation aron dili madamay sa kagubot.
