DAVAO CITY – Gilayon nga mihatag ug katin-awan ang Davao Light and Power Company (DLPC) kung nganong nakasinate ug brownout ang pipila ka mga lugar sa dakbayan atol sa gipahigayon nga eleksiyon niining milabay nga adlaw.
Kahinumduman nga pipila sa mga areas nga giserbisyohan sa Panacan Substation sa Davao Light and Power Corporation (DLPC) gikan Diversion Road crossing Mamay Road paingon sa Panacan Proper ngadto na sa UM Ilang sa Tibungco ang nakasinate ug duruha ka oras nga brownout.
Hinuon gibutyag ni DLPC Reputation Enhancement Assistant Vice President Rossano Luga nga ang wala gila-oman nga brownout wala nakaapekto sa pagboto sa mga botante gumikan kay dali sumala pa nila nga nabalik ang supply sa kuryente.
Nangayo ug despensa ang DLPC human ang nahisgutan nga insidente. Gawas sa nahisgutan nga dapit nakasinate sab ug brownout ang Sitio Polokon, Barangay Megkawayan sa Calinan District.
Pipila ka dapit usab sa Barangay Bangkas Heights ang apektado apan gilayon nga nabalik ang kuryente human nga mitawag ang principal sa Bangkas Elementary School.
