DAVAO CITY – Gipahibalo karon sa Department of Interior and Local Government kon DILG dinhi sa Davao Region nga mamahimo na ang mga lokal nga kagamhanan sa rehiyon nga magmugna og kaugalingong guidelines aron makunhuran ang pagsaka na sab sa mga kaso sa COVID19.
Sumala pa ni DILG-Davao director Alex Roldan, dili na matud pa maghatag ang gobyerno og bisan unsang kamanduan sanglit, ihatag na sa mga LGUs ang gahum sa pagimplementa sa striktong guidelines aron sa pagnihit sa ihap sa mga nataptan sa balatian.
Dugang pa ni Roldan nga dili matod pa maayo sa ekonomiya ang pagpatuman sa mga restrictions batok COVID.
Hinuon, giawhag sa DILG Davao ang tanan nga magpabakuna ug magpa-booster shots.
Ginasunod gihapon sa dakbayan ang Executive Order No. 71 ni Pangulong Bongbong Marcos nga nagbase sa naunang Executive Order 7 diin gitugutan ang boluntaryong pagsul-ob og face mask sa parehong indoor ug outdoor settings.
Dinhi gihapon sa dakbayan, ginabantayan gihapon ang ubay-ubay nga pagsaka sa kaso sa COVID 19 human sa gituohang pagkaylap pag-usab sa kagaw atol sa mga dagkong katikaran sa Davao City lakip ang paghinumdom sa Semana Santa.
Una nang gipaklaro sa DOH – Davao nga dili hinuon kini kabalak-an sanglit, mga asymptomatic ug mild lamang ang mga nagpahinabong kaso.
Awhag gihapon sa mga hingtundang ahensya nga bantayan ang kaugalingon ug isig-kaingon pinaagi sa pagsunod sa minimum public health standards sama sa pag-suot og mask, pag-disinfect ug pagpabakuna.
via || Bombo LJF
