DAVAO CITY – Gibutyag sa Davao City Health Office (CHO) nga misaka ang ihap sa dengue dinhi sa dakbayan gumikan sa dili tukma nga paglabay o pagbahin-bahin sa mga basura.
Sumala pa kang CHO technical division chief Doctor Julinda Acosta nga ang barado nga kanal ug ang dili tarung nga paglabay sa mga basura mamahimong breeding site sa mga lamok.
Angayan sab sumala pa nga masolusyonan ang suliran sa basura ning siyudad ilabi na nga delikado kini sa kinaiyahan ug panglawas.
Kahinumduman nga una ng nagpasibaw si D’ Bone Collector Museum director Darrell Blatchley human nga gi-post niini sa social media ang suliran sa basura sa kanal sa Barangay 37-D sa Bucana nga puno ug plastics ug uban pang basura.
Gani bisan nga nagpahigayon sila ug clean-up drive sa pipila ka mga kanal sa area, nagpabilin pa gihapon kini nga suliran.
Gitataw sab ni Acosta nga kawang lamang ang cleanup drives kung dili mismo ang mga barangay officials ang manguna sa pagsulbad sa suliran sa basura.
