DAVAO CITY – Dako ang pagtuo ni Department of Interior and Local Government (DILG) 11 Regional Director Alex Roldan nga gigamit lamang sa UCCP Haran ang mga bakwit nga lumad nga anaa karon sa ilang kustodiya aron nga makakuha og pondo gikan sa langyaw nga dapit.
Sumala pa ni Roldan, nga samtang anaa sa kustodiya sa Haran ang mga lumad, kuhaan sumala pa nila kini og hulagway aron nga ipadala sa langyaw’ng dapit aron nga makapangayo og pundo.
Gamiton sumala pa ang mga hulagway sa bakwit aron nga ipakita sa langyaw’ng mga grupo nga adunay suliran sa kahusay ug kalinaw sa pipila ka lugar sa Davao region.
Gihagit na lamang karon sa DILG ang kadumalahan sa UCCP-Haran nga kung tinuod nga adunay evacuation sa lugar, angayan lamang nga ila kining ablihan aron nga mahatag sa gobyerno ang panginahanglanon sa mga lumad.
Gumikan kay sirado kanunay ang Haran, walay kasayuran ang mga hingtungdan nga ahensiya sa kagamhanan kung adunay nahitabo nga trafficking o exploitation sa mga bakwit.
