DAVAO CITY – Suportado ni Alex Roldan, regional director sa DILG 11 ang rekomendasyon nga dili lugwayan ang gipatuman nga Martial law sa Mindanao.
Sumala pa kang Roldan nga ang pagpatuman matud pa sa nahisgutan nga lakang mamahimong makadaut sa imahe sa lugar ngadto sa uban nga nasod.
Lisud sab sumala pa nga mapalambo ang ekonomiya sa usa ka lugar sanglit magduha-duha na pagbubo sa ilang puhunan ang mga investors ilabi na kadtong gikan sa langyaw’ng dapit.
Dugang pa ni Roldan nga mas daghanang kasabutan ang mahisgutan ilabi na sa natad sa negosyo kung walay mabating kabalaka ang mga negosyante.
Samtang sa bahin sa Eastern Mindanao Command (EastMinCom), gikanayon sa ilang tigpamaba nga si Lt. Col. Ezra Balagtey nga uyon sila sa nahimong lakang ni Defense Sec. Delfin Lorenzana nga dili na lugwayan ang Martial Law sa Mindanao nga kutob na lamang karong katapusan sa Disyembre.
Dili na sab sumala pa kinahanglan ang nahisgutan nga lakang gumikan kay naka-establisar na sila og mga lakang aron nga mas mapalambo pa ang pagpatuman og seguridad sa ilang area of operation.
