DAVAO CITY – Nagpahimangno ang DILG 11 sa tanang katawhan nga mag-igmat sa nagkatag nga mga myembro sa grupong Bagong Bansang Maharlika kon BBM nga naglibot-libot sa sa mga barangay samtang nagapangayo og membership fee.
Gikanayon ni DILG 11 Regional Director Alex Roldan, nakakuha og impormasyon ang ilang ahensya nga nangayo silag kuwarta bugti sa ayuda sa gobyerno.
Matod ni Roldan nga wala niini nga progra ma ang gobyerno diin kinahanglang mobayad ang mga tawo aron makakuha og hinabang.
Dugang pa sa opisyal, base sa verification niini sa Securities and Exchange Commission, wala kuno permit to collect money ang nasangpit nga grupo.
Sa laing bahin, gitambagan sa DILG 11 ang mga kandidato ug supporters nga himoong malinawon ang kampanya sa naghiabot nga Barangay ug Sangguniang Kabataan Elections sa Oktubre.
Dugang pa nga nakigtagbo karon ang ahensya sa mga opisyal sa barangay aron tambagan batok sa pagdala og armas atol sa election period.
Matud pa ni Roldan nga ilang gimonitor ang mga private armed groups sa lugar, apan walay posibilidad nga pagpamugna sa maong mga grupo dinhi sa Davao Region.
Gilauman sab sa opisyal nga magkadaghan ang mga nanagan karong piniliay gumikan sa hisgutanang honorarium nga hinungdan sa pagbulag-bulag ug wala pagkasinabtanay tali opisyales sa barangay ug SK.
Gipunting sab sa opisyal nga mahinungdanon ang pagrespetohay tali batan-on ug mga hamtong nga opisyal alang sa pagpalambo sa barangay.
via || Bombo LJF
