DAVAO CITY – Hingpit na nga natapos ang Diarrhea Outbreak sa Toril ning dakbayan sa Davao diin anaa sa kinatibuk-ang 217 ka kaso ang natala gikan sa 25 ka mga apektadong barangay.
Kini mismo ang gipagawas nga anunsyo sa hepe sa Davao City Health Office nga si Dr. Ashley Lopez base subay na sab sa na-consolidate nga imbestigasyon gikan sa Epidemiology Bureau sa Department of Health, Davao City Water District ug sa City Government of Davao, human ang halos duha ka semana nga pagpahigayon nila og imbestigasyon sukad ang onset sa outbreak niadtong Hulyo 15.
Gikumpirma ni Dr. Ashley nga food contamination ug dili ang tubig gikan sa Davao City Water District ang hinungdan sa diarrhea outbreak sa Toril diin, subay sa ilang imbestigasyon, ang tapioca gikan sa Night Market sa Toril ang nag-unang hinungdan sa diarrhea diin sagad sa mga pasyente nga na-ospital ang kumpirmadong nakakaon sa Rasay St. Samtang ikaduhang gidudahan mao ang nakaon nga isaw sa mga biktima.
Sa pikas bahin, mikabat sa unom ang natalang casualty sa Diarrhea outbreak diin pinaka-latest niini mao ang usa ka 27 anyos nga lalaki nga residente sa Sitio Marapangi Toril diin gikumpirma sab ni Dr. Lopez nga nakakaon sab kini og Tapioca, isaw ug corndog sa Rasay St. niadtong Hulyo 15 diin gilayon sab kini nga nakasinati og signs and symptoms sa Diarrhea.
Namatay ang maong pasyente gumikan sa cardio pulmonary arrest secondary to severe dehydration niadtong Hulyo 24.
Ning kasamtangan, anaa sa 48 ang active cases sa diarrhea gikan sa kinatibuk-ang 217 ka mga kaso.
