DAVAO CITY – Aron nga masubay kung walay nahimong kalapasan ang mga gitukod nga condominiums dinhi sa dakbayan sa Davao, plano karon sa Department of Human Settlements and Urban Development (DHSUD) 11 nga subayon ang mga nahisgutan nga gambalay.
Tipik lamang kini human ang nahimong pahayag ni Pangulong Rodrigo Duterte nga pa-imbestigahan ang mga condominiums ingon man mga subdivisions sa siyudad human nga daghanan niini ang nangadaut human ang sunod-sunod nga pagtay-og sa milabay nga tuig.
Sumala pa kang Atty. R.M. Miguel Palma Gil, OIC-Regional Director sa DHSUD-11 nga sa mosunod nga bulan pahugtan na nila ang pagmonitor sa mga local ug national developer nga nagatukod og mga gambalay aron masubay ang kalig-on niini.
Gani lakip sumala pa ang mga condominiums nga wala nadaut atol sa linog ang subayon usab sa ahensiya.
