Gikumpirma sa Department of Foreign Affairs (DFA) nga adunay upat (4) ka mga Pilipinong nasamdan human sa pagpamomba sa Iran gamit og mga missile batok sa Israel.
Sumala ni DFA Undersecretary Eduardo De Vega, ang mga nasamdan nga Pilipino ang naggikan sa siyudad sa Rehovot, nga nahimutang sa gilayo-on nga 20 kilometros sa habagatan nga bahin sa Tel Aviv.
Lakip sumala pa sila sa 12 ka uban pang mga Pilipino nga anaa sa usa ka parke sa dihang naigo sa mga missile ang maong lugar.
Subay sa opisyal nga datos, usa sa mga biktima ang kasamtangang kritikal ang kahimtang.
Nagpadala na usab ang Embahada sa Pilipinas sa Tel Aviv og usa ka team aron susihon ang kahimtang sa mga nasamdan nga Overseas Filipino Workers (OFWs).
Padayon karon ang pahimangno sa DFA ug sa Embahada sa Israel nga magpabiling alerto ang mga Pilipino ug mosunod sa mga tambag sa lokal nga mga awtoridad sa Israel.
