DAVAO CITY – Gikalipay sa Department of Education-Davao Region ang dako nga turn-out sa mga nagpa-enroll alang sa school year 2022-2023 sa Davao Region.
Kini mismo ang gibutyag ni Jenielito “Dodong” Atillo, tigmapaba sa DepEd 11.
Sa ulahing report sa maong buhatan as of August 3, 2022, anaa na sa 712,620 ang nagpa-enroll gikan sa mga pampubliko ug pribadong tulonghaan sa rehiyon unse.
Ang maong ihap ang tugbang sa 51% sa mga estudyante nga na-enroll kaniadtong school year 2021-2022 nga anaa sa 1,395,893.
Ning kasamtangan, pinakadaghan ang nagpa-enroll sa dakbayan sa Davao nga anaa sa 274,187.
Gisundan sab kini sa Davao de Oro nga adunay 72,009; Davao del Norte nga adunay 66,364; Davao del Sur nga adunay 58,752; Davao Oriental nga adunay 51,764 ug 32,459 alang sa Davao Occidental.
Sa kinatibuk-an, alang sa public schools, anaa sa 43,518 ka mga estudyante ang nagpa-enroll sa kinder; 309,261 sa elementary; 195,430 sa junior high school ug 74,214 sa senior high school.
Samtang sa private schools, anaa sa 4,032 ka mga estudyante ang nagpa-enroll sa kinder; 18,809 sa elementary; 27,602 sa junior high school ug 39,754 sa senior high school.
