DAVAO CITY – Human nga personal mismo nga nasaksihan si Department og Education (DepED) Sec. Leonor Briones ang sitwasyon sa tulonghaan sa Nasilaban Integrated School sa Palma Gil Talaingod Davao del Norte diin daghanang mga batang lumad ang nagtungha.
Sumala sa kalihim nga gahinan sa ahensiya ug pondo ang nahisgutan nga lugar aron itukod ang tulo ka adanas nga gambalay nga adunay siyam ka nga classrooms.
Adunay itukod usab nga dormitoryo aron adunay kapundohan ang mga estudyante nga layo ang ilang mga panimalay.
Plano sab nga magpahimutang sa lugar ug solar panel aron adunay magamit nga mga computer ingon man catch basin aron nga makatigom ug tubig-ulan sanglit usa sa suliran sa lugar ang kawad-on tubig.
Atol sa pagbisita sa kalihim, nakita mismo niini ang tulonghaan sa Salugpongan nga nahimutang pipila ka metros gikan sa mga panimalay sa lumad apan poste na lamang ang nagbarog human nga gipangbungkag na kini sa mga residente sa lugar.
Sumala ni Sec. Briones, bisan nga layo ang maong lugar buot niya nga personal nga makita ang sitwasyon ilabi na nga daghanan na siya ug dawat nga report kalabot sa dili maayong binuhatan sa mga kabataan sa salugpongan.
