DAVAO CITY – Gipanghimakak ni Dodong Atillo ang tigpamaba sa Department of Education DepEd 11 nga ilang gimanduan ang mga ginikanan nga pasul-ubon gayud ang ilang mga anak ug school uniform bisan ug naa lamang sa online classes.
Sa pakighinabi sa Bombo Radyo, gitin-aw ni Atillo nga sukad pa sa una, wala na gi-require sa DepEd ang mga ginikanan nga mopalit ug school uniform alang sa ilang mga anak.
Kini ang sumala pa subay sa dugay nang gipatuman nga DepEd order diin ang school uniform dili requirement isip tabang na usab sa mga ginikanan aron dili makagasto ug dako.
Hinuon, giangkon ni Atillo nga halos tanan sa mga estudyante sa public schools naka-uniform, apan kini ang subay sa kasabutan tali sa mga ginikanan ug sa tulunghaan.
Apan, alang kang Atillo maayo usab nga magsul-ob ug uniform o kaha presentable nga senina ang mga estudyante bisan ug naa lamang sa balay ug walay face-to-face tali sa ilang maestra.
Kini aron bisan ug online classes lang ang nahitabo, mabati gihapon nila ang diwa sa ilang pag-eskwela.
