Gisuspinde ang mga klase sa kapin 6,000 ka pampublikong eskwelahan sa 11 ka rehiyon sa nasud tungod sa padayon nga epekto sa bagyong Inday ug sa habagat karong Biyernes, Hulyo 10.
Sumala sa Situation Report nga gipagawas sa Disaster Risk Reduction and Management Service, kapin 3.6 milyon ka mga estudyante ug labaw sa 149,000 ka school personnel ang naapektuhan sa 52 ka School Division Offices sa nagkalain-laing rehiyon.
Lakip sa mga rehiyong nagpatuman og kanselasyon sa klase ang National Capital Region (NCR), Calabarzon, Central Luzon, Mimaropa, Caraga, Cagayan Valley, Bicol Region, Ilocos Region, Zamboanga Peninsula, Western Visayas ug Northern Mindanao.
Dugang pa niini, gipadayag sa ahensya nga adunay pipila ka mga klase nga gipadayon na usab sa Region VI o Western Visayas, human mihupa ang epekto sa bagyong Inday sa maong lugar. Matod pa sa ahensya, nagpadayon ang hugot nga pagmonitor sa sitwasyon pinaagi sa Disaster Risk Reduction and Management Service, aron masiguro ang kaluwasan sa mga estudyante, magtutudlo ug ubang personnel sa mga eskwelahan.
Lakip sa mga direktibang gihatag ngadto sa mga eskwelahan ug field offices sa mga apektadong lugar ang pagpasidaan sa mga estudyante, ginikanan ug school personnel kabahin sa mga lakang sa kaluwasan ug andamong buhaton sa panahon sa emerhensiya.
Dugang pa niini, gimandoan usab ang mga eskwelahan sa pag-andam og first aid kits ug uban pang emergency supplies isip kabahin sa contingency measures aron masiguro ang kaluwasan sa tanang mahimong maapektuhan sa bagyo.
Sa kasamtangan, nagpadayon ang Department of Education sa pagmonitor sa kahimtang sa mga apektadong lugar ug sa pagpatuman sa angayng mga lakang aron malikayan ang peligro nga mahimong idulot sa bagyong Inday ug sa habagat.
