Gipangayo ni Department of Education (DepEd) Secretary Sonny Angara ang tabang sa Department of Public Works and Highways (DPWH) aron masulbad ang problema sa mga estudyante sa Kayapa, Nueva Vizcaya nga napugos og kumbayot sa pisi aron lang makaabot sa ilang eskwelahan.
Kini human nga nahugno ang tulay nga nagdugtong sa Sitio Macdu, Barangay Pinayag, Kayapa, niadtong Nobyembre 2024 tungod sa grabe nga kadaot nga gidala sa bagyong Pepito. Pinauyon sa iyang opisyal nga sulat ngadto kang DPWH Secretary Manuel Bonoan, gilauman ni Angara nga mahatagan og aksyon ug solusyon ang kahimtang nga ginaatubang sa mga estudyante sa Pinayag National High School.
Matod sa DepEd, dako nga peligro alang sa mga estudyante ang pagtabok sa suba pinaagi lamang sa pisi, ilabi na karon nga nagpadayon ang klase matag adlaw. Gibutyag usab sa DepEd nga importante nga matabangan dayon ang komunidad sa Kayapa aron maprotektahan ang kaluwasan sa mga kabataan ug aron dili maapektuhan ang kalidad sa ilang edukasyon.
Gitutukan niini nga kinahanglan dali nga matukod pag-usab ang tulay aron masiguro ang luwas ug hapsay nga biyahe sa mga magtutungha paingon sa ilang eskwelahan.
