DAVAO REGION- Gipatawag sa Schools Division of Davao de Oro ang principal sa Tibagon Elementary School aron nga sayron ang nahitabong pagkamatay sa usa ka magtutudlo nga una ng gipasangil sa kabanay nga tungod kini sa pagpangasaba sa nahisgutan.
Kini ang kabahin sa pagahimuon nga imbistigasyon sa DepEd Divison sa maong probinsya aron nga masuta kung unsay hinungdan sa kamatayon a biktima.
Una na usab nga nagpadangat sa kasub-anan ang DepEd Division sa pamilya ni Mrs. Marjorie Espinosa Llanto-Boldo, usaka maestra sa Tibagon Elementary School, nga nakabsan a kinabuhi niadtong September 19, 2024.
Gipasalig sa DepEd Davao de Oro sa publiko ang makuti nga imbistigasyon sa hinungdan sa iyahang kamatayon ug nihangyo kini ug mga pag-ampo alang sa kalag sa maestra ingon man ang kusog sa pamilya ning panahon sa kalisdanan.
Kahinumduman nga Subay sa gi-post sa pag-umangkon sa biktima nga screenshots gikan sa groupchat sa maong magtutudlo ug mga inahan, nakasab-an sumala pa si Teacher Marjorie gumikan adunay usa ka ginikanang midiretso pagsumbong ngadto sa principal inay nga moduol kaniya.
Kini sumala pa human nga adunay insidenteng nahitabo sulod sa classroom diin ang anak sa maong mireklamo, nagkadugo ang ulo, human nga naigo sa bangko ang ulo sa bata gumikan sa pagsayawsayaw niini.
Mabasa sa maong chat sa magtutudlo nga una na niyang gibadlong ang mga bata nga dili magdagan-dagan og basin musantop sa disgrasya.
Gani mihangyo pa ang maong magtutudlo ngadto sa mga ginikanan nga og adunay concern i-agi una kaniya aron kini ang maisturyahan. Dugang pa sa maong magtutudlo nga sulod sa hataas nag panahong nahimo kining maestra, karon ra matud pa sya nainsulto pag-ayo sa principal.
Sumala pa sa naasoy nga maestra, nga gikwestyon matod pa ang iyahang pagkamaestra, diin karun lamang sumala pa kini niyang nasinatian sulod sa kapin 30 na katuig niyang nahimong magtutudlo.
Gani, human sa pagpagawas niini sa gibati ngadto sa mga ginikanan, nagkanayon pa kini nga kalimtan na lamang ang panghitabo og mag move-on na lamang sila. Apan human ang pila ka semana, nakutluan ang maong magtutudlo sa kinabuhi.
Sa pagkakaron, ginahaya na ang patayng lawas sa maong biktima samtang wala pa usab nagpagawas og pamahayag ang eskwelahang gitudluan niini.
