DAVAO CITY – Gihan-ay na sa Department of Education 11 uban ang mga nagkalain-laing ahensya sa dakbayan ang ilang pagpangandam alang sa umaabot nga Balik Eskwela nga magsugod karong adlawng Martes, Agosto 29.
Atol sa nahitabong Interagency Convergence Meeting kagahapon sa buhatan sa DepEd 11, gikanayon ni Regional Director Allan Farnazo nga gilaumang muabot sa kapin-kulang usa ka milyon ka mga estudyante lakip trese mil ka mga magtutudlo sa tibuok Davao Region ang dungan nga magbalik sa 657 ka mga tulunghaan alang sa academic year 2023-2024.
Pipila lamang sa mga gihatagan og pagtagad atol sa panagpulong ang mga mamahimong plano alang sa seguridad, kaluwasan, ug kalidad sa edukasyon nga angayng makab-ot sa mga estudyante alang sa ilang hingpit nga pagbalik sa mga klarum human sa dul-ang tulo ka tuig sa pandemya.
Apan una niana, nagpasalmat ang Dep 11 sa malampusong coverage nga hatud sa Bombo Radyo Philippines sa natapos nga Palarong Pambansa 2023 diin gipahigayon sa Marikina, Metro Manila.
Sumala pa ni Farnazo, dako ang gikuptang papel sa media sa paghatag og mahinungdanong impormasyon ug ingon man, pagdasig sa mga atleta atol sa ilang pagsabak sa nagkandaiyang sporting events.
Kahinumdumang nakaangkon sa ika-unom nga pwesto sa kinatibuk-an ang delegasyon sa Davao Eagles karong tuig nga pinakataas na placement gikan sa ika-11 nga pwesto kaniadtong 2019.
