DAVAO CITY – Gipapalihok karon sa DepEd Davao ang pagpabalik-normal sa kahimtang sa daghanang mga tulunghaan sa Davao Region nga nalunop sa tubig baha human sa halapad nga pagbaha ning milabayng simana.
Atol sa pakighinabi sa Bombo Radyo Davao kang Jenelito Atillo, ang tigpamaba sa DepED 11, nga gimanduan na ni Regional Director Dr. Allan Farnazo ang schools division offices sa rehiyon alang sa pag-restore sa normalcy sa mga klase ug pagbangon sa daghanang tulunghaan sa dali nga panahon human sa nahitabong katalagman.
Una na dinhi ang inventory sa tanang mga teaching ug non-teaching personnel ingon man mga estudyante nga apektado sa mga pagbaha.
Ikaduha ang pagmugna og kaugalingon niining assistance program alang sa mga nahisgutan pinaagi sa paghatag og hinabang gikan sa kaugalingon niining panudlanan o inabagan sa ubang mga ahensya.
Laraw sab sa ahensya ang paglugway sa Brigada Eskwela ngadto sa mga apektadong iskwelahan.
Giawhag karon sa ahensya ang mga ginikanan nga dunay anak nga nagtungha sa mga less affected schools nga mutabang sa mga ilabihang nabahaan nga manglimpyo sa mga nalunop nga mga tulunghaan.
Gipakusgan sab sa DepED Davao ang pagtinabangay alang sa mga apektadong estudyante aron mabatunan gihapon ang learning continuity sa sulod sa mga tulunghaan nga temporaryo nga gihimong evacuation centers pinaagi sa paghatag og learning modules gikan sa mga less-affected nga mga school divisions nga ihatag sa mga labing apektadong tulunghaan sa rehiyon.
Dugang pa sa buhatan, adunay mando ang DepED Davao sa mga Schools Division Offices nga dawaton sa mga pampublikong eskwelahan ang mga estudyante gikan sa mga lugar nga labing naapektuhan sa pagbaha sama sa Davao del Norte ug kasikbit nga mga probinsya.
Kinahanglan lamang nga magpahibalo ang mga estudyante sa ilang mga tulunghaan alang sa ihatag nga assistance sa temporary nga pagpa-transfer.
Sa kinatibuk-an, tumong sa DepED 11 ang pagpadayon sa pagtuon sa mga estudyante taliwala sa nasinatiang pagbaha sa Davao Region.
