DAVAO CITY – Dungan sa pagsugod sa Brigada Eskwela o operation school cleanup, nanawagan karon ang Department of Education Davao Region (DepEd-11) ngadto sa mga kandidato ug mga civic groups nga tabangan sila nga manglimpiyo sa mga election materials.
Una ng gibutyag ni DepEd-11 spokesperson Jeneilito S. Atillo nga nagpadala na sila sa ilang hangyo ngadto sa local candidates kalabot sa maong butang apan wala pa silay nadawat nga tubag niini.
Mihangyo na sab sila sa pipila ka mga organisasyon nga tabangan sila nga manglimpiyo sa mga tulonghaan.
Sa milabay nga bulan, gi-anunsiyo sa DepEd nga gisuspendido ang klase sa tanan nga mga pampublikong tulonghaan sugod Mayo 2 hangtud 13.
Kini isip pagtamud sa DepEd Order No. 29, diin ang klase sa tanan nga level ang temporaryo nga ihunong sulod sa duruha ka semana arun nga mahatagan ug dalan ang mga magtutudlo nga makahimo sa ilang mandato atol sa milabay nga eleksiyon.
Kaniadtong May 8, ang DepEd-11 nagpagula ug memorandum alang sa hinanali nga pagpanglimpiyo human ang eleksiyon.
Gihangyo sab karun ang tabang sa mga barangay officials, stakeholders, candidates, ug uban pang mga volunteers nga mutabang sa pagpanglimpiyo sa mga polling precincts ug sa palibot niini.
