DAVAO CITY – Nanawagan ang ahensiya sa Department of Education (DepED) 11 nga unta likayan ang pagpakatag ug mga text messages nga mamahimong hinungdan sa pagkabalda sa klase sa mga tulonghaan.
Kini ang gibutyag ni DepEd spokesperson Jenielito Dodong Atillo human ang ulahing insidente diin anaa sa 29 ka mga tulonghaan ug liboan ka mga estudyante ang apektado sa mikatag nga text nga nanghulga sa pagpahigayon ug pangayaw human nga gipasirad-an ang daghanang mga tulonghaan sa salugpongan.
Bisan nga dili pa kumpirmado ang kung adunay kamatuoran ang gipakatag nga mensahe, gikanayon ni Atillo nga mahinungdanon pa gihapon ang seguridad sa mga magtutudlo.
Samtang sa bahin sa kasundalohan, gipasalig ni Capt. Jerry Lamosao, tigpamaba sa 10th ID Philippine Army nga padayon nila nga imonitor ang sitwasyon sa lugar aron nga masiguro ang seguridad sa mga sibilyan ug malikayan ang posibleng kagubot.
