DAVAO CITY – Nanawagan ang usa ka opisyal sa Department of Education-Davao Region (DepEd-Davao) ang publiko nga i-report gilayon sa ilang buhatan kung adunay mga sayop sa self-learning modules ug dili i-post sa social media.
Sumala pa kang DepEd Spokesperson Jenielito Atillo nga pipila ka mga post sa social media ang mipakita ug mga sayop ingon man confusing questions kalabot sa pipila ka mga printed materials, apan dili nila madetermina o makumpirma kung pipila sa nahisgutan nga mga modules ang gi-printa ug nahatud sa pipila ka rehiyon.
Gi-angkon sa DepEd official nga dili gayud kalikayan nga adunay mga sayop luyo sa hugtanon nga evaluation ug screening nga gipahigayon. Apan gitataw niini nga dili tukma nga sa social media ipasibaw kung adunay nakitang mga sayop.
Mamahimong maapektohan sab sumala pa ang reputasyon sa mga magtutudlo nga naningkamut sa paghimo sa nahisgutan nga module.
Wala sab gipadaplin ni Atillo ang posibilidad nga ang pipila ka mga viral posts ang gi-edit aron nga dauton ang DepEd ilabi na nga giduso niini ang modular-type nga pagtuon karon sa mga estudyante isip kabahin sa New normal.
