DAVAO CITY – Giangkon ni DepED 11 Spokesperson Jenelito “Dodong” Atillo nga lig-on ang ilang pagpatuman sa DepEd Order No. 40, series of 2012 kon Child Protection Policy sa mga pampubliko ug pribadong tulonghaan.
Gikanayon sa opisyal nga usa sa maayong butang sa maong katumanan ang pagamugna og Child Protection Committee diin mamahimong idangop sa mga estudyante o ginikanan ang bisan unsang matang sa bullying nga nasinatian sa tulonghaan.
Ang maong komitiba ang gilangkuban sa school principal, mga pangulo sa PTA ug student body government, ug mga barangay officials.
Dungang pa ni Atillo nga nakigkoordina sab ang buhatan sa mga hingtungdang ahensya sama sa PNP, Social Welfare Offices ug uban pa, aron magmantala sa mga nagpalabing kaso sa pagpangdaug-daug sa mga tulonghaan.
Subay sab niini, gipangayo sab sa buhatan ang mga nagkadaiyang Anti-Bullying Policy sa mga pampubliko ug pribadong tulonghaan aron mahatagan og permit to operate.
Hangyo lamang ni Atillo sa katawhan nga itugyan sa mga hingtungdan ang mga nasayrang kaso sa bullying aron dili masangko sa hilabihang pagka-agrabyado sa mga estudyante.
Nahimong bug-at nga hisgutanan sa syudad ang kaso sa paghunos sa kaugalingong kinabuhi sa usa ka 13 anyos nga tumutuon sa Marilog District, ning dakbayan niadtong nakalabay’ng bulan human gibutyag sa iyang suwat nga gina-bully kini sa iyahang classmate.
via || Bombo LJF
