DAVAO CITY – Nanawagan ang Department of Education (DepEd) 11 ngadto sa publiko nga makig-alayon gilayon kanila kung aduna nasayran nga mga tulonghaan nga nakasupak sa ilang gipatuman nga “No collection policy”.
Tipik lamang kini human nga gitino ni DepEd spokesperson Jenielito Dodong Atillo nga kinahanglan walay pangayuon nga bayad ngadto sa mga nagpa-enroll.
Apan gitino sa opisyal nga adunay mga ekwelahan nga nagakolekta ug bayad sa membership fee sa Boy Scout ug Girls Scout, bayrunon sa Philippine Red Cross ug daghanan pa diin ang makolekta niini gamiton sab sa uban pang panginahanglanon sa tulonghaan.
Hinuon dili sumala pa kini pugsanay ug dili mamahimong basehan sa mga magtutudlo sa paghatag ug grado ngadto sa mga estudyante.
Gipasabot ni Atillo nga ang “No collection policy” usa ka mandato sa ahensiya ilabi na sa mga pampublikong tulonghaan ug kinahanglan sumala pa kini nga tumanon.
