DAVAO CITY – Gidasig sa Department of Education 11 ang mga tinugyanan sa balaod sa Talaingod, sa Davao del Norte nga hatagan ug seryosong pagtagad ang gikaingong bahad nga pagpangayaw sa pipila ka mga lumad.
Sumala pa kang DepEd 11 spokesperson Jenielito ‘Dodong’ Atillo, tinuod man o dili ang Pangayaw angay matud pa kining hatagan ug pagtagad sa mga hingtungdan nga buhatan sa kagamhanan ilabi na nga apektado na ang pagtungha sa kapin 200 ka mga kabataan.
Kini human gisuspendi una ang klase sa siyam ka tulunghaan sa maong lugar alang na sab sa kaluwasan sa 29 ka mga magtutudlo.
Samtang gidayeg sab sa DepEd-11 ang lakang nga gihimo ni Talaingod Mayor Junie Libayao sa paghatag ug aksyon sa nadawat ang bahad rason nga naglusad gilayon ug pulong uban ang DepEd, kapulisan ug kasundaluhan.
Una nang gibutyag sa Mayor ang Pangayaw threat nga posible matud pang gipaluyuhan sa mga Ata Manobo rebel leaders nga pabiling nidapig sa Salupungan.
Ang bahad migula pipila ka adlaw human sa suspension order nga gipakanaog sa DepEd-11 batok sa mga Salugpungan Schools sa Davao Region.
