DAVAO CITY- Gibalik sa Davao City Police Office ang Oplan Davao Defense System (DDS). Kini subay sa nahitabo nga pagpamomba sa usa ka unit sa Yellow Bus Line sa syudad sa Tacurong, Sultan Kudarat kung asa usa ang natalang namatay samtang 11 ang samaron.
Gibutyag ni Police Col. Alberto Lupaz, City Director sa DCPO, nga kini nga lakang usa sa pamaagi aron pahugtan pa ang security measures sa borders sa syudad aron walay susamang insidente ang mahitabo.
Dugang pa sa opisyal, ang DCPO wala nagpaubos sa ilahang alerto inay nagpabilin kining igmat sa pagbantay sa seguridad sa syudad.
Samtang, pabilin sab ang dakbayan sa pagpatuman sa No Pick-up Policy sa mga bus stops ug sa Davao City Overland Transport Terminal (DCOTT) lamang pwede nga musakay ang mga pasahero.
Samtang gipasalig sab ni LT. COL Darren Comia, Commander sa Task Force Davao, nga ilaha matud pang gihugtan ang inspeksyon sa mga border control checkpoints sa dakbayan ug ilang gidungagan ang mga personahe sa tagsa-tagsa ka mga checkpoints.
