DAVAO CITY – Gikumpirma karon sa Davao City Water District (DCWD) nga luwas ug dili kontaminado gikan sa bacteria nga gahatud og waterborne diseases sama sa diarrhea ang ilang tubig nga ginapang-apod-apod sa mga residente sa mga apektadong Barangay sa dakbayan.
Subay kini sa gipagawas nga resulta sa water sampling ug testing kagahapon, Lunes, Hulyo 18, 2022 sa 10 representatives stations sa Puan, Bago, Gallera , Balio , Bago Aplya ug Toril areas, lakip ang Bato, Lizada Street, Binugao, Sirawan, Rasay Street, ug St. Peter’s College sa Toril diin mao kini ang mga lugar kung asa adunay natala nga insidente sa diarrhea.
Subay sa gipadala nga pahayag gikan sa nahisgutang buhatan, ang maong mga water stations gipailalom sa Colilert-18 test diin subay sa resulta, nagnegatibo tanan sa Escherichia Coli ug total coliform.
Matud sab sa DCWD, anaa sa 0.3-1.5 ppm ang clorine residuals ang ilang ginagamit diin nagpasabot kini nga adunay igo nga chlorine aron mapanalipdan ug ma-disinfect ang tubig sa mga distribution network.
Una na gisiguro ni Jovana Cresta Duhaylungsod, deputy spokesperson sa DCWD, adunay mga lakang ang water facility aron maatiman ang kalidad sa tubig.
Gawas niini, walay nakitang dagkong leak o water leakage sa ilang distribution line sa mga apektadong lugar.
Via || Hana Rallos
