DAVAO CITY – Walay natala nga mga violations ang Davao City Police Office ug ubang security forces nga kasamtangang ginadeploy atol sa unang tulo ka adlaw nga pagsaulog sa Araw ng Dabaw.
Gikanayon ni DCPO Spokesperson Police Major Catherine dela Rey nga dagkong butang ang pagkasayod sa mga Dabawenyo mahitungod sa pag-obserba sa culture of security, lakip ang pagkabalo sa mga angay ug dili angayng dalhon atol sa paglantaw sa mga programa sa kasaulogan.
Hugot nga gipatuman sa dakbayan ang pagbawal sa pagsuot ug pagdala sa mga panabton o hinagiban nga dunay dagkong potensyal nga maghatod ug hulga sa seguridad atol sa kasaulogan.
Sa pikas bahin, gilauman sab ang pag-abot sa mga dagkong personalidad nga musalmot sa mga kalihukan sa Araw ng Dabaw.
Unang gikanayon sa opisyal nga mala-VIP ang ilang ihatag nga security sa mga dagkong pangalan nga mubisita sa mga programa sa Araw ng Dabaw ilabi na kang kanhi Pangulong Rodrigo Duterte ug Vice President Sara Duterte.
Gipaabot na lamang ang mga mamahimong intenerary sa duha ka Duterte ug sa uban pang mga dagkong pangalan nga magsing-abot sa musunod pang mga adlaw apan gipaniguro sa DCPO ang ilang pagkamaabi-abihon sa mga importanteng bisita.
Gipakatag na ang 12,000 ka mga security personnel sa tibuok Davao City atol sa usa ka bulan nga selebrasyon sa ika-86 nga charter day sa dakbayan sa Davao.
via || Bombo LJF
