DAVAO CITY – Aron mahatagan og hinanaling aksyon ang usa ka krimen, nanawagan karon ang Davao City Police Office sa mga Dabawenyo nga gilayong i-report sa ilang buhatan ang bisan unsa mang matang sa krimen ug iligal nga binuhatan inay nga ipa-agi pa kini sa social media.
Kini ang nahimong pahayag ni DCPO Spokesperson Pol. Maj. Maria Teresita Gaspan subay sa gapanghitabo matud pa nga robbery incidents sa Catalunan Grande ug Toril ning syudad nga ning kasamtangan trending na sa social media.
Dugang pa ni Gaspan nga lisud ang pag-verify kung tinood ba o dili ang maong facebook post sa gikaingong robbery incidents sa maong mga lugar gumikan walay naabot nga report sa ilang buhatan.
Gumikan niini, gi-reactivate sa DCPO ang Oplan Robbery/ Hold-up, Akyat Bahay ug Theft o “RAT Tugis” aron subling mahatagan og pagtagad ang maong mga taho ug gilayon sab mapangita ang mga suspek sa pagpangawat og pagpanulis diri sa dakbayan.
Kahinumduman nga una nang nag-viral ang matud pa nahitabong pagpanulis sa Catalunan Grande diin gihimo kini sa usa ka armadong lalaki nga naka motorbike.
Sa gihapon, pakyas kining nasubay gumikan walay nadawat nga formal complaint ang kapulisan.
Gikumpirma sab ni Gaspan nga niadtong Hulyo 1 hangtud 17 ning kasamtangang tuig, anaa na sa 15 ka mga kaso sa pagpanulis ug pagpangawat ang natala sa syudad.
Hinoon, malampuson usab nga nasikop ang mga suspek.
