DAVAO CITY- Nanghatag ug mga bulak ang mga personahe sa Davao City Police Office ug mga bulak kaganihang buntag atol sa Valentine’s Day.
Gipangunahan ni Davao City Police Office Director(DCPO) Police Colonel Hansel M. Marantan ang pagpanghatag sa mga bulak ngadto sa mga kababainhan sa kadalanan atubangan sa DCPO.
Uban ang mga kaubanang opisyal sa kapulisan gipanghatagan og rosas ang mga pasaherong babae dungan sa pagtimbaya og Happy Valentine’s Day nga kasagaran nagsakay sa mga PUJ.
Lakip usab sa mga natagaan ang mga anaa nagbaktas ug niagi atubangan sa DCPO. Nasayran nga naandan na kini sa gihimo sa kapulisan matag panahon sa Valentine’s Day.
Samtang sa laing bahin, ang Davao Oriental Police Provincial Office adunay gipahigayon usab nga pre-Valentine’s activity sa Mati City.
Nanghatag usab ang kapulisan og mga rosas sa mga kababainhan sa mga nag-unang lugar sama sa bus terminal, public market, hospitals,ug mga tulunghaan.
Gawas sa mga bulak, nanghatag usab ang otoridad og leaflets nga adunay mahinungdanon nga impormasyon kabahin sa RA 11313 kon (Anti-Bastos Law) ug Gender-Based Violence, uban ang PNP emergency hotlines.
