DAVAO CITY – Nakatala karon ang Davao City Police Office (DCPO) og kinatibuk-ang 567 quarantine violators nga nasikop sa siyudad kalakip na ang 267 ka mga napasakahan ug kaso sa korte sukad niadtong Marso 20 hangtud Abril 12.
Sumala pa kang DCPO director Police Colonel Kirby John Kraft nga nakiglambigit ang DCPO sa local government unit aron nga hugtanon mapatuman ang community quarantine guidelines nga gitakda sa siyudad.
Una ng gipatuman ang Community quarantine guidelines kaniadtong Marso 19 hangtud nga gihimo kining enhance community quarantine (ECQ) kaniadtong Abril 4 aron malikayan ang pagkatag sa virus.
Sa nahisgutan nga ihap, nakasikop ang otoridad ug 389 individuals nga nakalapas sa curfew policy, 102 sa liquor ban, samtang 76 ka mga indibidwal sa social distancing policy ingon man pagpahigayon ug mass gathering.
Gikanayong nagpakatag ang DCPO ug dugang mga puwersa aron motutok sa 20 quarantine control points sa siyudad ug masikop ang mga violators.
Samtang nagpahimangno ang otoridad sa mga mamumuo nga exempted ilalom sa ECQ nga mag-andam ug ID o certificate of employment sa higayon nga molatas sa control point aron nga dili kini malangan.
