DAVAO CITY – Hugtanong gikondena sa Davao City Police Office kon DCPO ang gipagawas sa usa ka impormasyon nga gisibya sa ere bandang alas 7:55 sa buntag niadtong Martes, Enero 4, sa programa ni TV and radio anchor nga si Noli de Castro.
Sa maong balita, gibutyag nga 37 ka mga pulis sa Davao nagpositibo sa drug test.
Sumala ni DCPO spokesperson Police Captain Hazel Tuazon nga usa ka sayop nga impormasyon ang gisibya ni De Castro.
Gipaklaro sab niini nga walay nagpositibo nga pulis sa Davao City sa ilegal nga droga gumikan sa kabahin kini sa hugot nga lakang sa pakigbatok sa ilegal nga droga.
Ang 37 nga nagpositibo sa ilegal nga druga mao kadtong mga personahe sa Davao City Public Safety and Security Office kon PSSO atol sa gihimong suprise drug test niadtong Mayo 3 ug Mayo 13 sa Davao City Recreation Center.
Nunot sa resulta sa nahitabong drug test, gitambagan ni PSSO Head Angel Sumagaysay ang City Mayor’s Office sa pag-terminate sa mga indibidwal.
Namahayag sab ang PDEA Davao nga mag-atubang sa mga sangputanan sa administratibo, lakip ang suspension o termination ang bisan kinsa nga trabahante sa gobyerno nga magpositibo sa ilegal nga droga.
Mopailawom sab sila sa mga intervention program ubos sa Republic Act 9165 kon Comprehensive Dangerous Drugs Act of 2002.
Tungod niini, hugtanong gikondena sa kapulisan sa dakbayan ang maong misinformation ug mistrust sa publiko.
Hugtanon sab nga nanawagan ang kapulisan nga i-verify ang mga nakalap nga impormasyon una pa man kini ibuhagay o isibya sa kahanginan o sa bisan unsang platform.
