DAVAO CITY – Mipasidaan ang Davao City Police Office sa katawhan batok sa mga indibidwal nga nalambigit sa pagpalsipikar sa mga pampublikong dokumento.
Kini human sa nahitabong pagkasapon sa duha ka mga suspek atol sa entrapment operation niadtong Huwebes sa hapon, Mayo 9, sa usa ka mall sa Bolton St., Barangay 3-A ning dakbayan, tungod sa pag-peke sa mga dokumento sa usa ka printing services stall.
Sumala ni DCPO Spokesperson Police Capt. Hazel Tuazon, nakadawat ang ilang buhatan og mga reklamo ug impormasyon nga ilegal nga nag-imprenta ang print business stall sa mga identification cards kon ID sa mga PUJs sa Davao City.
Namatikdan nga ang maong mga ID kinahanglan lamang i-isyu sa City Transport and Traffic Management Office kon CTTMO.
Subay sa impormasyon, dugay na nga nag-imprenta og ilegal nga ID ang mga suspek. Nanaglakip ang mga silot sa pagpalsipikar sa mga pampublikong dokumento sa unom ka bulan ug usa ka adlaw nga pagkabilanggo nga adunay mga multa nga kwarta.
Kahinumduman nga nasikop ang duha ka mga indibidwal kini human nga nameke ug nagbuhat og Public Utility Vehicle ID.
Subay sa rekord, giila ang mga dinakpan nga mao sila alyas Zyca, tag-iya sa computer shop, 32 anyos ug residente sa Purok 3, Kawayan Drive, Matina ning siyudad; ug usa ka alyas Jane, 19 anyos, usa ka estudyante ug lumulupyo sa Sanaza Street, Purok 15, Baranga 76-D, Bucana, ning dakbayan
Nakumpiska sa otoridad ang usa ka computer set, 2 ka printer, usa ka laminated machine ug P600 nga kantidad sa kwarta.
Sa pagkakaron, anaa na sa kustodiya sa kapulisan ang mga dinakpan ug mag-atubang og kasong Falsification of Public Document.
