Nagpaabot karon ang Davao City Police Office (DCPO) sa desisyon sa pamilya sa usa ka minor-de edad nga miambak gikan sa ika-upat ka andana sa usa ka inn sa Claro M. Recto Avenue, Davao City, niadtong Abril 25, 2025, kung magpasaka ba sila og kaso. Sumala ni Police Captain Hazel Tuazon, ang tigpamaba sa DCPO, hangtod karong higayona, wala pa mopadayag ang pamilya sa ilang lakang kalabot sa pagkamatay sa ilang 16-anyos nga paryente.
Gisugdan dayon og imbistigar ang insidente human makadawat og report ang San Pedro Police Station nga adunay babaye nga natagak sa Claveria Street (karong CM Recto Avenue). Sa ilang pag-abot sa lugar, ilang nakit-an ang biktima nga naigo pa og jeepney sa dihang mitugpa kini sa karsada. Base sa records sa inn, ang dalagita mi-check in niadtong Abril 24, 2025, gi-assign sa ika-tulo ka andana apan misaka sa fire exit hangtod ika-upat ka andana ug dayon miambak.
Samtang gidali dayon siya og transport sa Southern Philippines Medical Center (SPMC diin gi-report nga kritikal ang iyang kondisyon. Apan pagkabuntag, gikumpirma sa DCPO nga namatay na ang biktima. Sa pagkakaron, gitan-aw sab sa mga otoridad ang posibleng kalapasan sa inn nga mitugot og check-in sa minor, samtang ang drayber sa Public Utility Jeep (PUJ) nga nakabangga sa biktima temporaryong gibantayan karon sa kustodiya sa kapulisan.
