DAVAO CITY- Nagkanayon ang Davao City Police Office kon DCPO nga adunay pagkunhod sa crime statistics alang sa unang lima ka bulan sa tuig 2024.
Base sa datos nga gipagula sa maong buhatan adunay nakita nga dakong pagkunhod nga 43 ka insidente o 28.47% nga nahilakip sa index crimes kon ginakonsidera nga seryosong mga kalapasan.
Samtang ang lugos, kawat ug pagpatay ang nagpabiling labing kaylap nga indeks nga krimen.
Matud pa nga ang pagsupak sa mga espesyal nga balaod, nga gicategorize isip non-index crimes ang gideklara usab nga miubos sa 19 ka insidente o 1.93% atol sa maong panahon.
Apan, ang maong datos usab ang nagpakita nga adunay pagsaka sa mga drug-related offenses diin gikan bulan sa Enero hantod Mayo 2024, adunay 614 ka mga pagsupak sa Comprehensive Dangerous Drugs Act kon RA 9165 o anaa kini sa 11.23% nga pagsaka kon itandi kini sa 552 nga pagsupak niadtong tuig 2023.
Samtang aduna usab pagkunhod sa ihap sa mga misupak sa RA 9282 kon Illegal Gambling ug RA 10591 o Illegal Possession of Firearms diin mikunhod kini ngadto sa 23.53% o katugbang kana sa 96 ka kaso ug 71.43% o katugbang sa 15 ka kaso.
Matud pa sa tigpamaba sa DCPO nga si Police Captain Hazel Tuazon nga nagapakita lamang kini sa ka-epektibo sa mga operasyon sa kapulisan sa pagpabilin sa kahapsay sa syudad. Dako usab ang pasalamat niini sa pagkoopera sa katawhan sa pagpakgang sa krimen sa syudad.
