DAVAO CITY – Karun pa lang nangandam na ang mga sakop sa Davao City Police Office (DCPO) sa ipatuman nga hugtanong seguridad sa gikatakda nga pagpanumpa ni outgoing Davao City Mayor ug presumptive Vice President Sara Duterte-Carpio sa June 19, 2022.
Sumala pa kang DCPO spokesperson Police Major Maria Teresita Gaspan nga sa kasamtangan giplano pa nila kini sanglit wala pay venue diin ipahigayon ang pagpanumpa ni Mayor Inday.
Usa sa ilang gipangandaman karun ang ihap sa mga security personnel nga i-pakatag sa venue arun nga masiguro ang seguridad.
Wala sab sumala pa nila gipadaplin ang posibilidad nga pagtambong ni Pangulong Rodrigo Duterte sa maong aktibidad.
Sa mga plano nga musaksi sa maong aktibidad, gitambagan ni Gaspan ang publiko nga dili magdala ug backpacks ingon man hugtanon nga gidili ang pagsuot ug jacket.
Mas maayo sab matud pa nga dili na magdala ug mga bata ang mga ginikanan.
Kahinumduman nga una ng gibutyag ni Mayor Inday nga buot niyang sayo nga manumpa gumikay kay mutambong kini sa pagpanumpa usab ni presumptive President Ferdinand ‘Bongbong” Marcos Jr.
