Bisan paman nga kanselado ang pipila ka mga nag-unang aktibidad sa Araw ng Dabaw karong tuiga gumikan sa hulga sa Coronavirus Disease (COVID-19), hugtanon gihapon ang ipatumang seguridad sa buhatan sa Davao City Police Office (DCPO) aron nga maprotektahan ang mga Dabawenyo atol sa selebrasyon.
Kini mismo ang gibutyag ni Pol. Col. Kirby John Kraft, Direktor sa DCPO atol sa pagselebrar sa kapulisan sa Dabaw sa ika-29 nga Founding Anniversary sa Philippine National Police.
Gibutyag ni Kraft nga walay mabag-o sa ilang ipatumang seguridad o security plans alang sa maong selebrasyon aron nga dili gayud mahatagan og higayon ang mga indibidwal o grupo nga dunay laraw nga musabwag og kagubot sa usa sa pinakadakong aktibidad sa dakbayan.
Gani gibutyag sa direktor nga anaa sa 1,200 ka mga police personnel ang ipakatag sa nagkadaiyang aktibidad atol sa selebrasyon sa Araw ng Dabaw.
Gipasalig sab ni Kraft nga bisan paman og nakuhaan ang mga aktibidades sa maong selebrasyon, padayun gihapon ang ilang pagbantay sa seguridad sa katawhan og magpadayon sila sa ilang trabaho tungod og alang sa kaayuhan sa tibouk dakbayan sa Davao.
