DAVAO CITY – Girekomenda karon sa Davao City Police Office (DCPO) ang psychiatric evaluation sa carnapping suspect nga mikawat sa meat van ug nagpasutoy ug dagan sa kadalanan sa siyudad.
Sumala pa kang DCPO spokesperson Police Captain Rose Aguilar nga ipailalom sa eksaminasyon si Carmelito Pamogas Tabion, 27, residente sa Old Market, Kalamansig, Sultan Kudarat kini tungod sa nahimong pahayag sa igsuon niini nga adunay sakit panghuna-huna ang nahisgutan.
Gitudlo sab si Tabion nga usa ka notadong kawatan ug nalambigit sa ginadili nga droga.
Nasayran nga gi-inquest na kagahapong adlawa ang nahisgutan diin gipasakahan kini ug kasong multiple cases sama sa kalapasan sa Republic Act (RA) 10883 (New Anti-Carnapping Law), direct assault ug damage to properties.
Apan gitataw ni Aguilar nga tungod wala pay psychiatric assessment ang suspek, kinahanglan pa gihapon niini nga atubangon ang kasong kriminal nga giduso batok kaniya.
Sa higayon nga mapamatud-an nga adunay deperensiya sa pangutok ang suspek, mamahimong ibalhin kini sa mental hospital.
Sa kasamtangan, gibalhug sa Sta. Ana Police Station ang suspetsado.
