DAVAO CITY – Karun pa lang mihatag na ug pasalig ang buhatan sa Davao City Police Office (DCPO) nga magpatuman ug hugtanon nga seguridad alang sa May 9, 2022 elections, ilabi na sa pagsiguro sa seguridad sa first family nga gikatakdang moboto sa tulonghaan.
Sumala pa kang DCPO Chief Alberto Tupaz , andam na sila nga muhatag ug area security, traffic direction ug control, ingon man pagpakatag ug special weapons and tactics (Swat) team kung gikinahanglan gawas pa sa Presidential Security Group sa first family.
Gani mamahimo sab nila nga dungagan ug duruha ngadto na sa upat ka mga personahe ang presinto diin moboto si Pangulong Duterte.
Kahinumduman nga ang Pangulo ug si Mayor Sara Duterte ang moboto sa Daniel R. Aguinaldo National High School (DRANHS).
Samtang sa pikas nga bahin, ang mayoral candidate nga si Baste Duterte moboto sa precinct no. 3046A sa Catigan Elementary School samtang si Paolo Duterte, nga mikandidato sa First District Congressional Office, ang moboto sa precinct no. 0920A sa Catalunan Grande Elementary School.
Una na sab nga gibutyag ni DRANHS Administrative Officer Margarita Castillo nga ang historical chair kaniadtong 2016 nga gigamit ni Pangulong Duterte dihang miboto kini maoy balikon usab niini atol sa iyang pagboto karung bulan sa Mayo.
Subli nga ghipasalig ni Tupaz nga anaa na sa 100-percent ang kaandam sa DCPO sa nagsingabot nga eleksiyon ug anaa sa 2,010 personnel ang ilang ipakatag sa dakbayan.
Hugtanon sab nila nga imonitor ang pagpatuman sa liquor ban ilabi na sa mga establisyemento nga namaligya ug alak ingon man pagpatuman ug gun ban sa siyudad diin anaa na sa 59 ka mga kaso ang ilang natala sukad Enero hangtud karung panahona.
