Gipalig-on sa Davao City Police Office (DCPO) ang ilang kampanya batok sa pagpanghilabot atol sa eleksyon sa 2025 pinaagi sa estrikto nga pagpatuman sa balaod batok sa vote-buying.
Sumala pa ni Police Captain Hazel Caballero Tuazon, ang tigpamaba sa DCPO, nga ilang dakpon ang bisan kinsa nga masakpan nga nagapadagan ug vote-buying bisan pa kung kini walay warrant of arrest.
Gani, gihulagway ni Tuazon nga kini nga lakang usa ka mahinungdanon nga paningkamot aron mapreserbar ang tinud-anay nga tingog sa katawhan ug masiguro ang patas ug malinawon nga eleksyon.
Giklaro usab niini nga ang mga kapulisan magpabilin nga alerto ug magmatngon sa tibuok kampanya aron maseguro nga walay mabaligya o malisang sa ilang katungod sa pagbotar.
Gisaad usab sa DCPO nga magpabilin kini nga magpatuman og tinud-anay nga pagbantay sa seguridad aron maseguro ang patas nga proseso sa piniliay.
Samtang, gipasiugda usab niini ang panawagan sa publiko nga magmatngon ug ipahibalo dayon sa mga otoridad kung adunay makita nga ilegal nga kalihokan nga may kalabotan sa vote-buying.
Dugang pa sa opisyal, nga ginaduso sa mga otoridad ang tinguha nga magpadayon ang malungtaron nga demokratiko nga proseso sa pagpili sa mga lider sa umaabot nga piniliay.
Sa ilang pagpakabana, padayon niini nga ipatuman ang balaod alang sa mas tinud-anay ug limpyo nga eleksyon sa 2025.
