DAVAO CITY- Giklaro sa tigpamaba sa Davao City Police Office (DCPO), nga dili gikan sa dakbayan ang nasakmit nga kapin P6M nga kantidad sa illegal nga droga.
Sumala pa ni P/Capt. Hazel Tuazon, ang tigmapaba sa DCPO nga base sa ilang monitoring, walay natala nga drug lord dinhi sa syudad, rason nga igo lamang kining gisulod dinhi sa dakbayan.
Kahinumduman nga nakuha sa usa ka panimalay sa negosyante ang nahisgutang kantidad sa illegal nga droga sa may Maa ning dakbayan, human nga nihatag og impormasyon ang suspek nga giilang si alias Jose nga matud pa aduna kini gipangtaguan nga dagkong putos sa illegal nga droga sulod sa iyang panimalay, rason nga gilayon kining giadtoan sa mga otoridad.
Narekober sulod sa maong panimalay ang dagkong pakete sa illegal nga droga nga gibana-banaang nagkatitdad og P6,949,000. Nasayran nga si alias “Jose” ang una ng nababagan sa Task Force Davao ug kapulisan sa Brgy. Sirawan, Toril, ning dakbayan uban ang usa ka babae nga si alias Ruby dihang nagdala kini og illegal nga droga kon shabu nga nagkantidad og kapin P300,000.
Narekober sab sa nahisgutan ang usa ka pistola nga adunay unom ka mga bala.
Ning kasamtangan, nagalusad na og lalom nga imbestigasyon ang kapulisan kalabot sa tinubdan sa minilyon nga kantidad sa droga kalakip na ang pagpasaka og kasong kalapsan sa RA 9165 kon Comprehensive Dangerous Drugs Act of 2022 ug RA 10591 tungod sa paghupot og armas nga walay igong dokumento.
Sa pikas bahin, nanawagan si Tuazon ngadto sa publiko nga gilayong itaho sa ilang buhatan ang bisan unsa mang makadudahang aksyon nga ilang mabantayan.
Kini human namatikdan sa mga kapulisan ang daghanang indibidwal nga adunay laraw nga magdala ug magpasulod og illegal nga droga dinhi sa syudad diin posibleng makaimpluwensya sa mga menor de edad.
Alayon niini, laraw karon sa maong buhatan ang pakipagtambayayong sa mga nagkadaiyang barangay, lakip na ang pagpalig-on sa mga border controls sa may Sirawan, Calinan, ug Bunawan checkpoints aron mapadayon ang kalinaw sa Davao City.
