DAVAO CITY – Gibarugan sa Davao City Police Office (DCPO) nga wala silay namonitor nga “ninja cops” sa siyudad luyo sa nagpadayon nga pagdungog sa senado kalabot sa mga nalambigit niini.
Gitumbok ang Ninja cop sa mga police officer nga nalambigit sa pag-recycle sa mga nakumpiskang illegal nga droga.
Sumala pa kang Brig. Gen. Marcelo Morales, police regional director, nga adunay tulo ka mga police officers ug pito ka mga non-commissioned officers ang gimonitor gumikan kay nalambigit kini sa ginadili nga droga.
Apan gikanayon ni Police Major Jason Baria, tigpamaba sa Police Regional Office (PRO) 11 nga wala nila gipadaplin ang posibilidad sa intelligence network sa rehiyon nga gitumbok nga mga police officer ang nadestino dinhi sa siyudad.
Gipasalig sab sa PRO nga gipahugtan pa nila karon ang ilang internal cleansing, monitoring ug pagbantay sa ilang mga police personnel.
