DAVAO CITY – Dako ang pagsalig sa pamunoan sa Davao City Police Office (DCPO) nga walay sakop sa kapulisan sa ilang han-ay ang malambigit sa indiscriminate firing ilabi na panahon sa kapaskohan ug pagtagbo sa bag-ong tuig.
Sumala pa kang Police Col. Kirby John Kraft , director sa DCPO, sa kasamtangan wala pa silay nadawat nga direktiba gikan sa ilang buhatan sa kaulohan nga adunay himuon nga muzzle taping o pagtaptap sa buka sa mga armas aron nga dili kini pabuthon panahon sa holiday season.
Kahinumduman nga tuig 2016 pa gi-undang ang muzzle taping sa mga armas dinhi sa dakbayan kaniadtong DCPO director pa sa siyudad si Sen. Ronald dela Rosa.
Samtang nanawagan sab si Kraft ngadto sa mga dabawenyo nga hugtanon pa gihapon nga ginadili ang pagpaboto panahon sa kapaskohan ug bag-ong tuig hinungdan nga gi-awhag sab niini ang publiko nga ipahibalo gilayon sa kapulisan kung adunay masayran nga nakasupak sa firecracker ban sa siyudad.
Pahayag ni Police Col. Kirby John Kraft , director sa DCPO.
