Gikataho sa Davao City Overland Transport Terminal kon DCOTT nga mikabat na sa kapin 1,500 ka mga bus ang nagabyahe matag adlaw ilabi na sa mga busy nga adlaw susama sa holiday season.
Sumala pa ni Dcott Manager Aisa Usop, kini usa ka dakong pagtaas kung itandi sa 2023 diin mas ubos ang ihap sa pasahero pag-abot sa Disyembre 24 ug 25.
Samtang niadtong 2024, misaka ang ihap sa mga pasahero, hinungdan sa pagdugang og daghang mga bus aron matubag ang panginahanglanon.
Ang matag adlaw nga mga byahe sa bus milapas na sa 1,500, nga katugbang sa kapin 80,000 ka pasahero matag adlaw.
Sumala pa ni Usop nga ang target lamang sa DCOTT alang sa mga ‘holiday season’ anaa sa 1,000 hangtod 1,500 ka mga byahe sa bus, apan niadtong miaging mga ‘holiday season’ nilapas sumala pa og 1,500 ang mga byahe.
Kasagaran mahitabo ang ‘peak travel days’ tulo ka adlaw sa wala pa ang Pasko ug Bag-ong Tuig, ug sa mga adlaw nga musunod.
Dugang pa niini, nga sa mga busy nga panahon kasagarang ginalaoman sa Dcott nga makaproseso og 1,500 ka bus trips matag adlaw, nga katugbang sa 75,000 hangtod 80,000 ka pasahero.
Gipahayag ni Usop nga ang ihap sa pasahero mas taas pa sa ilang ginalaoman, nga miresulta sa mga linya sa mga commuters nga miabot na sa gawas sa terminal.
Bisan paman niini, paspas gihapon ang dagan sa linya gumikan sa bag-ong gibutang nga baggage x-ray machine.
Gikanayon niini nga kini nga updated nga makina mas moderno bisan nga gamay tandi sa giilisan niini.
Nagpadayon sumala pa ang operasyon sa mga bus companies niadtong Pasko ug Bag-ong Tuig aron maserbisyohan ang mga pasahero niini.
Gibutyag usab ni Usop nga ang gipaabot na kadaghanon sa pasahero niadtong Nobyembre 2024 wala nahitabo, apan mibawi hinuon ang ihap sa mga pasahero niadtong Disyembre, 2024.
